Песните на Јован Стрезовски се одликуваат со богата метафоричност, асоцијативност и рефлексивност, со јадровити лирски форми, свежи и богати поетски слики, со филозофска промисла и искуство, со рафинирана стилистика и јазична полнотија. Јован Стрезовски ја воспева природата. Во секој цвет, тревка или дрво го препознава убавото лице на животот, ја возвишува сликата со осмислени и грижливо одбрани зборови. Преку сјајот и светлината, преку ситните нешта на природата, ги освојува широките пространства на планината, искачувајќи се до врвовите.